Styrar Mona Marøy kom sjølv frå ein annan liten, privat barnehage. Slik oppsummerer ho overgangen.
- Det var godt å komme inn i Bergen kommune. Eg opplever at kommunen er veldig profesjonell. Her er vi del av eit stort barnehagenettverk med mykje kunnskap og ressursar.
Som i dei fleste barnehagar ønsker òg Bjerknesparken seg fleire tilsette. Med fleire tilsette blir barnehagen mindre sårbar når mange av personalet er sjuke på same tid.
- I førre veke var halvparten av dei som jobbar her, sjuke. Diverre fekk vi ikkje tak i vikarar til å dekke opp alle stillingane. Då var det vanskeleg å gi barna det tilbodet dei fortener og som dei har krav på, fortel Mona Marøy.
Byråden forstår kva styraren snakkar om. Kona hans arbeider i barnehage, og dei tre barna deira har gått i barnehage i Bergen. Sjølv har han eksamen i barne- og ungdomarbeidarfaget frå heimlandet Finland.
- Barnehage og skule betyr mykje for mange. Det gjer det til den mest interessante byrådsavdelinga å jobbe i, meiner Daniel Hägglund.
- Eg skal jobbe for at de får dei ressursane de treng, men eg kan sjølvsagt ikkje love noko, svarar byråden.