Å legge ned ein grunnstein er ein tradisjon og høgtideleg milepæl i alle byggeprosjekt. Fredag 1. desember la byråd for barnehage og skule, Daniel Hägglund, ned grunnsteinen på nye Garnes ungdomsskole.
Rektor Ragnhild Joan Kaarstad er veldig nøgd med at byggeprosjektet no er komme så langt.
- Vi har venta på dette i mange år og har sett fram til at det skulle skje noko her. Det var først då dei reiv den gamle skolen for eit år sidan at vi skjønte at vi faktisk skulle få eit nytt skulebygg. Vi gler oss veldig til å få nye lokale, seier rektoren.
Grunnsteinen er ein tidskapsel
Grunnsteinen er eigentleg eit skrin laga av koppar. På lokket er det ein inskripsjon der det står kven som legg ned grunnsteinen og dagen steinen ble lagt ned. Inni skrinet ligg det ein hundrekroneseddel, dagens aviser (Bygdanytt, Bergens Tidende og Bergensavisen), gjennomføringsvedtaket, kontrakten og teikningar av den nye skulen.
Eit senter for nærmiljøet
Skulen er bygd for at store delar av spesialromma og idrettsbygget skal kunne lånast ut til innbyggarar, kultur- og idrettsaktivitet, lag og organisasjonar.
- Ambisjonen er at dette ikkje berre blir ein skule, men eit senter for nærmiljøet her på Garnes og i Arna. Målet er at bygget skal være i bruk meir eller mindre 24/7, sa byråden for barnehage og skule i talen sin.
Flyttar inn i løpet av hausten 2025
Den nye ungdomsskolen skal ha plass til 520 elevar inkludert ei forsterka avdeling med 20 elevar.
Skulen blir klar i løpet av hausten 2025. I byggeperioden held elevar og tilsette til i lokala til tidlegare Arna gymnas.